არჩილ კალანდია ნედიმ სოზბირს შეხვდა
2026 წლის 21 სექტემბერს, თურქეთის რესპუბლიკაში საქართველოს საგანგებო და სრულუფლებიანმა ელჩმა, არჩილ კალანდიამ შეხვედრა გამართა დუზჯეს უნივერსიტეტის რექტორთან, ნედიმ სოზბირთან.
საქართველოს საელჩოსა და დუზჯეს უნივერსიტეტს შორის თანამშრომლობის შედეგად, ასევე საქართველოს საგარეო საქმეთა და განათლებისა და მეცნიერების სამინისტროების მხარდაჭერით, ელჩმა უნივერსიტეტის ბიბლიოთეკას საჩუქრად გადასცა, როგორც ქართველი კლასიკოსი მწერლების, ასევე თანამედროვე ავტორების წიგნები, მათ შორის თურქულ ენაზე ნათარგმნი. აღსანიშნავია, რომ უნივერსიტეტის ბიბლიოთეკაში მოეწყობა ქართული კუთხე.
არჩილ კალანდიამ ნედიმ სოზბირს მადლობა გადაუხადა, დუზჯეს უნივერსიტეტში ქართული ენისა და ლიტერატურის მიმართულების აქტიური მხარდაჭერისთვის და ხაზი გაუსვა ქართული ენის პედაგოგების განსაკუთრებულ წვლილს.
გარდა ამისა, საქართველოს ელჩი დუზჯეს უნივერსიტეტის ქართული ენისა და ლიტერატურის მიმართულების პედაგოგებს და სტუდენტებსაც შეხვდა და ლექცია წაიკითხა საქართველო-თურქეთის ურთიერთობების შესახებ.